© Copyright by Erinnerungswerkstatt Norderstedt 2004 - 2017
https://www.ewnor.de / http://erinnerungswerkstatt-norderstedt.de
Ausdruck nur als Leseprobe zum persönlichen Gebrauch, weitergehende Nutzung oder Weitergabe in jeglicher Form nur mit schriftlichem Einverständnis der Urheber!
Diese Seite anzeigen im

Dat Kühlsche Windrad an de Neendörperstroot

Vöriget Johr kreeg ik een sülven mookte Postkoort. De harr een Leser an den Heimatspeegel schreven un mien Nomen  insett. Op de Koort weer een Bild affdruckt von dat Kühlsche Windrad.

Mit den Text wull de Leser mi op dat oole Windrad opmerksom moken. De stünn nu mol int oole Gorstedt un ik schull doch mol wat doröver schrieven. Dat heff ik insehn un mi op de Socken mookt Material to sammeln. Bi den Koortenschriever müch ik mi bedanken för disse Anregung - aver dat kann ok nich. He hett vergeeten de Koort to ünnerschrieven un een Affsenner weer dor ok nich op. Dor he mi mit Liebe Inge anschrifft, mutt ik annemmen, dat he mi goot kennt. Aver ik weet bit hüüt nich, wer de Koort schreven hett. Villicht leest he jo nu disse Geschicht un röppt mi mol an. Dor tööv ik op!

Gorstedt is jo all över 600 Johr oolt un hett so goot wie nix wat historisch von Wert is.Von de oolen Strohdackhüüs gifft dat jümmers weniger . Ton Bispill alleen in de oole Dörpstroot stünnen - so veel as ik weet - ölven strohdeckte Hüüs un hüüt stoht jüst noch twee  dorvon. Dor kannst keenen Stoot mit moken.

Dat Kühlsche Windrad weer nich so oolt as de Hüüs aver doch een Wohrteken von Gorstedt. Baut hett dat Otto Kühl 1913.Mit 36m Hööchte weer dat jo ok nich ganz lütt un von wieden to sehn. Dat Rad sülven weer in sleswig-holstee-ner Farben - blau-witt-root - anmoolt. Dat Rad harr 12 m Dörchmeter. Dat Ünnergestell weer ut Iesen as de Eiffelturm in Paris.

Otto Kühl mutt wat von de Elektrizität verstohn hebben, un glöövt hett he wohl ok- dat he so an Strom komen kunn. Denn dat geev dormols noch gor keen in Gorstedt- eerst 1919 is över de Stromversorgung verhannelt worrn.

Dat Windrad bedreev op den Buurnhoff Woterpumpen,een Häckselmaschien, een Rövensnieder, een Kornmöhl un sorg ok wohl för dat Licht int Huus. Dat Windrad schull de Arbeit op’n Hoff lichter moken. Dat hett wiß ok klappt.

Op de anner Siet weer dat genau so wiß nich billig dat Windrad to plegen. Alle veer Weken müssen de Schruven notrocken warrn, ok nee wörrn aff un an nödig un smeert un öölt müß dat komplett von ünnen bit boben.

Veele Johrn heet dat Windrad sienen Deenst doon. Oftmols is de Blitz insloon in dat Rad - wat man sik goot vörstellen kann. Ok de Storm hett dat Rad bannig tosett , aver de Verankerung in de Eer hett dat allns affholn.

Ik heff jümmers dacht, dat Rad steiht dor un höört eenfach to Gorstedt. De Pleeg un dat Bewohrn - doröver hett sik nüms Gedanken mookt - bloß Familje Kühl hett dat markt ant Lock in’n Geldbüdel.Opletzt geev dat ok keen Ersatzdeele mehr un dat Windrad wöör 1960 affbaut. Bit 1967 stünn de Toorn noch - denn keem he ok weg. De Gorsteter hebbt dat beduurt. Villicht harrn se all dor achter stohn müßt , üm dat Rad un dat Wohrteken to retten. Op dat holpen harr? Wöör de Kühlsche Möhl- as wi dorto seggen - noch stohn? Ik glööv meist nich - dormols weern de Lüüd noch nich op den Antiktripp un hüüt kannst di dat nich mehr leisten.

De modernen Windrö, de wi hier nich wöllt,  sind nich so hübsch - so as dat blau-witt-rode Windrad von Kühl an de Neendörperstroot — een verswunnen Wohrteken von Gorstedt.