© Copyright by Erinnerungswerkstatt Norderstedt 2004 - 2017
https://www.ewnor.de / http://erinnerungswerkstatt-norderstedt.de
Ausdruck nur als Leseprobe zum persönlichen Gebrauch, weitergehende Nutzung oder Weitergabe in jeglicher Form nur mit schriftlichem Einverständnis der Urheber!
Diese Seite anzeigen im

April, April !!

Von mienen Vadder heff ik dat plattdüütsche Wöörbook von Mensing arft. He hett dat in de twintiger Johrn bestellt. Jeden Monat keem een neet Heft rut un bi uns an, dat mien Modder denn betohlen müß. Wat hett se männichmol schimpt un kloogt, dat se dat Geld nich över harr. Aver affbestellt wöör dat nich. Dorför bin ik hüüt dankbor. Dat Lexikon besteiht ut fiev grote , dicke Bänn. In disse Bööker mag ik to geern stöövern un meist lees ik mi denn dorbi fast.

So güng mi dat för ‘n poor Doog. Ik müß wat nokieken, üm to sehn, wie dat schreeven wöör. Dorbi füll mi dat Woort April int Oog un dach: Dor steiht aver veel över den Monat April. Dor muß du doch mol genauer hinkieken. Un denn weer dat wedder so wiet.

Snacks as: De April, mookt wat he will — oder — De April is too goot, he schenkt den Tuunpohl een witten Hoot, de kennt man un hett dat oftmols all sülven seggt.
Aver denn güng dat los mit in’n April schicken. Glieks weer ik wedder in mien Kinnertiet, as mien Tante mi losschick, bi Tante Ella dat groote Bohnenseev to holn oder anner Johr von Onkel Gustav de Dackscheer. Wenn nich oppassen deest, schicken se di von Huus to Huus un nirgends kreegst dat, wat du holn schullst. Un bi Lesen füng ik an to gnittern un lachen, dat mi opletzt de Tronen dollepen. Verkniepen kunn ik mi dat nich. Mien Mann froog mi: Wat leest du dor eegentlich?Och, bloß int Lexikon.Ach so. He kennt dat all un amüseert sik över mi.

Nu will ik doch mol’n poor Tipps affgeven, womit man fröher anner Lüüd in April schicken kunn un ok dee. Wichtig is to weten, dat mööt Soken sien , de dat wirklich nich gifft! Anners is dat keen Aprilscherz!

Non Afteker un Koopmann wöör een schickt, de Soken as disse holn schull: Mückenfett, drögde Provisers (Aftekerhelpslüüd), Haumiblau, för’n Groschen Haudrop, Geetminatt, affbroken Muurmannsneesen, drögen Finstersweet, drögen Essig, ’n Liter Neihgorn, Eiersoot, blaue Tweersoot, Sticknodelsomen, för fiev Penn Nixindetüüt, för tein Penn Knööplöcker un veeles mehr.
Bin Bäcker schull man de Kringelscheer, von Muurmann den Steenhobel oder de Wandscheer, von’n Nober den Hohnholtbessen, dat Immenmess (zum Bienenschlachten), dat Oogenmoot, dat Törfmoot oder dat Lachbook holn. Markt ji all, worüm ik so lachen müß? Too schöön, wenn eener op son Blödsinn rinfallt.

Man geev aver ok den Foppten mol eenen Zettel mit op’n Ding — oder Buurnstock. Dat is een Knüppel, de an’n Enn eenen Spalt hett, wo de Zettel rinkümmt. De warrt denn von Huus to Huus drogen. Wenn man de Noricht leest hett, schick man den neegsten dormit los. Op den Zettel steiht: Hüüt is de eerste April, dor kann man de Narrn hinschicken, wohin man will. Kloor harr man keen Tiet un schick den Narrn wieder no den neegsten Nober.

Man kann aver ok ropen : Kiek mol, dor flüggt een Mehlbüdel dörch de Luft oder dor flügt een Adebar mit’n Holtbeen. Kickt eener hoch no’n Heven, röppt man gau : April, April!

Kinner warrt ok schickt mit eenen goden Root: Ik schall von mienen Vadder seggen, se schulln nich ehrer backen, ehe se ehr Mehl hebben. Aver de Kinner weern ok nich ut Dummsdörp. Se schicken ehr Öllern non Nober ton Klönen un de Nobers to ehr Öllern, so dat de sik op de Stroot dropen. April, April! — Un wenn denn eener dorbi weer, de keen Spooß verdrägen kunn!

Rächen kunn man sik, un de Lüüd de op de sülvige Oort in ‘n Mai schickt warrt, röppt man to: A-Mai, A-Mai - de Katt schitt in de Hei(d).

Hebbt ji een beten Spooß hatt? — Jo? Dat freut mi. Aver schickt mi bitte nich in’n April, ik fall so licht rin!!