© Copyright by Erinnerungswerkstatt Norderstedt 2004 - 2017
https://www.ewnor.de / http://erinnerungswerkstatt-norderstedt.de
Ausdruck nur als Leseprobe zum persönlichen Gebrauch, weitergehende Nutzung oder Weitergabe in jeglicher Form nur mit schriftlichem Einverständnis der Urheber!
Diese Seite anzeigen im

Bütten wat von Dröben — 1990

Dat wi Frünnen in de DDR hebbt, heff ik all vertellt. De Mann un mien Mann weern tohoop in  Kriegsgefangenschoop west. Nu schull uns de Dochder mit Mann un Dochder besööken, wi harrn jüm inloodt.

Ik mutt vörher vertelln, dat wi all een poor Johr nix von jüm direkt höört harrn bloß över de Öllern. Silvia weer scheedt un harr ut disse eerste Ehe een Dochder. As se ehrn tweten Mann kennen lehr un he ehr heiroden wull, harr se Bedenken hatt. He weer Koch un Proviantje bi de Volksarmee, un wenn se heiroden, denn dröff se mit uns keenen Kontakt mehr hebbn.

Ik heff ehr dormols eenen langen Breef schreeven un ehr verkloort, dat wi in ehr Leven man een ganz lütte Rull speelt, een Mann aver een groote, wenn he sien Leven mit ehr deelen wull. Se hebbt denn heiroodt un wi höörn, wie geseggt bloß över de Öllern von jüm.

As de Muur füll, hebbt se an 22. Dezember 1989 een Stück Muur utbroken un an uns schickt. Un nu wullen se kommen. Wat hebbt wi schööne un lustige Stünnen tosomen hatt! Dat weer so, as wenn nie wat twüschen uns stohn hett — op gor keenen Fall son Muur as de DDR baut hebbt — wi weern een groote Familje.

As wi obends bi’n Buddl goden Rotspon int Vertelln keemen, kreegen wi Trabbigeschichten to höörn, wie wi se noch nich kennen deen.

Eerste Geschicht:

Burghart fohrt mit sienen Trabbi no Berlin, he wull sien Silvia besööken. Op de Autobohn füng de Trabbi mit een Mol an to qualmen. Anhooln, den Motordeckel hoch un de Batterie affklemmen, weer in Null Komma Nix doon. Nu müss de Motor eerstmol koolt warrn. Denn dat Kobel mit Ploster isoleern un dat allns in Düstern. As he dat trecht harr, hett he ganz liesen den Motor wedder anloten. He leep - aver Licht kunn he nich anmooken. Un so is he ohne wiederfohrt no Silvia  de merden in den Ostdeel von Berlin wohnt un is dor unbehelligt ankomm’n.

Twete Geschicht:

Wenn du bi’n Trabbi eenen Keilriemen nee optrecken musst, bruukst du dorför anderthalv Stünn Tiet, aver du musst dat ok können. Eerstmol warrt dat rechte Rad vörn affmonteert, denn de Lichtmaschien lööst un op de Siet kippt un denn kannst du den Keilriemen optrecken. Dorno kriggst allns wedder an sienen Platz. De annerthalv Stünn sind vörbi, un du musst di sülven wedder op Vördermann bringen. Dat duurt ok sien Tiet, denn du musst jo bi disse Arbeit ünner den Trabbi liggen, dat is anners nich trecht to kriegen.

Dritte Geschicht:

Burghart vertell uns, dat he sik in sienen Trabbi een Radio un Luutspreekers inbauen leet. Gediegen weer, dat dorno de Trabbi duppelt so veel Sprit as vörher sluken dee. He fohr also wedder hin no de Warkstell. De Monteur harr dat wohl noch nie mookt. Sien Kolleegen harrn em glieks för’n Narrn un sään: Du musst doch weeten, dat du lüttere Schruven nemmen musst as de geleeverten — mit de grooten Dinger bohrst du Löcker in den Tank! Un so weer dat ok . De bipackten Schruven passt eben nich — is doch kloor!!