© Copyright by Erinnerungswerkstatt Norderstedt 2004 - 2017
https://www.ewnor.de / http://erinnerungswerkstatt-norderstedt.de
Ausdruck nur als Leseprobe zum persönlichen Gebrauch, weitergehende Nutzung oder Weitergabe in jeglicher Form nur mit schriftlichem Einverständnis der Urheber!
Diese Seite anzeigen im

Twee Kinner ünnern Schirm

Wenn ick hüüt an mien oole School an de Neendörper Stroot vörbi goh, denn mutt ick jümmers no de beiden Kinner ünnern Schirm kieken. Du weeßt nich, wo de sind? Na, links an de Eck von dat Schoolhuus von’n Schoolhoff ut sehn — teemlich hoch anbröcht. Dor över hebbt se een Lamp fastmookt, de no mien Meen dat lütte Kunstwark stöört, aver dat geiht wohl nich anners.

Hüüt heet sowat Kunst am Bau - ob dat fröher ‘n Nomen harr, weet ick nich. Aver disse beiden Kinner ünnern Schirm - von em vull Leev borgen - weer nich dat eenzige Kunstwark. Dorto höör noch de Drinkwoterbrunnen in de School ut dat sülvige Materiol.

De School-Ingang is noch as he 1929 baut worrn is; de poor Stufen sind ok bleven. De groote Flur güng bit op de annere Siet. Dor weern Buntglasfenster insett, man kunn also nich op de Stroot kieken. Wat dor för Motive op to sehn weern, weet ick nich mehr, aver ick glööv dor weern Menschen op. Rechts un links an de Wannen no de Klassenrüüm to weern de Garderovenhoken anbröcht. Un dor twüschen weer de runne opmuurte Brunnen. He harr een groote brune Keramik- oder Steengootschöttel- ut dat sülvige Materiol as de Kinner. Ton Drinken müss man eenen verchromten Ring mit beide Hannen dooldrücken un denn keem ut de Mitt een Woterstrohl hoch. Gau hööl man de open Snuut doröver un kunn klooret, sauberet Woter drinken. Leet man den Ring wedder los un hochkommen,versieg de Woterstrohl.

Hüüt süht dat dor ganz anners ut. De Garderoven sind weg, den Brunnen hett man tweihaut un den ganzen Platz för een Zimmer mit’n Wand affdeelt. Dor schall de Lehrerbibliothek bin wesen,is jo egol, wat dor bin is — de Architekt wöör sien schönet Entree nich wedderkennen un mi fehlt wat — de Brunnen mit de bunten Fenster dor achter.

Dankbor bin ick dorför, dat dat Treppenhuus so bleven is, as ick dat noch kenn. Ok dat Gelänner is erholn. Ick erinner mi, dat de Kinner versöchen op den breden Handloop ut Holt doltorutschen - aver dor weern de verdreihten Knööp anbröcht, de leten de Kinner dat ganz flink vergeten. De deen wirklich weh! Aver dat geev een anner Oort flinker no ünnen to komen.Mit den linken Arm över dat Gelänner sick fastholn un den linken Foot ünner dat Gelänner op den schrägen Ünnerbau stellen, denn kunn man dolglitschen. Woher ick dat weet? — Jo, glöövst Du denn, ick heff dat nich versööcht ?!  Genau as alle annern Kinner. Bloß footkriegen loten dröff man sick nich - dormols geev dat noch wat an de Riestüten - aver versöken müß man dat!!