© Copyright by Erinnerungswerkstatt Norderstedt 2004 - 2017
https://www.ewnor.de / http://erinnerungswerkstatt-norderstedt.de
Ausdruck nur als Leseprobe zum persönlichen Gebrauch, weitergehende Nutzung oder Weitergabe in jeglicher Form nur mit schriftlichem Einverständnis der Urheber!
Diese Seite anzeigen im

Vör 80 Johr — Barbier(Putzbüdel) in Gorstedt

As Hermann Langehein 1919 ut’n Krieg keem, hett he sik in Gorstedt bi Horn in de oole Dörpstroot twee Stuben meedt un dor een Loden opmookt, wo Mannslüüd sik de Hoor snieden un ok den Bort affraseern loten kunnen. He güng aver ok von Huus to Huus un raseer sien Kunnen dor. Dorto bruuk he denn sienen Putzbüdel, wo he sien Warktüüg bin harr.

Dat Woort Putzbüdel is aver ok för den Mann bruukt worrn, un he warrt ok hüüt noch so nöömt, wenn denn de Lüüd noch echt platt snackt. Son Putzbüdel weer gliektiedig dat Blatt. He kreeg veel to höörn un kunn’n Barg Nees ünner de Lüüd bringen. Dat: Wat harr he hüüt denn in sien Putzbüdel? heet, wat harr he Nees to vertelln. Hermann Langehein güng dat nich anners.

Mit’n flotten Schritt weer he jümmers ünnerweg’s, he harr nich veel Tiet, so seh dat ut. Mien Grootvadder jedenfalls keem in Gang’n, wenn em Langehein ankünnigt wöör. Aver de leep nich bloß flott - he weer ok flott bi de Arbeit, se güng em fix von de Hand.

As he sienen Loden bi Horn opgeven müß, weil dor een Neihstuuv inricht wöör, hett he eerstmol een Bood bi Horn in Goorn opstellt un dor sien Kunnen bedeent.1925 hett he denn dat Huus in de Ossentoller Stroot 42 baut un 1928 noch ‘n Stück för sien Veehtüüch anbaut.

De Loden is hüüt (Februar 2001) noch in Bedriev. Op de een Siet sind hoch an de Butenwand dree lütte Buntglasfenster anbrööcht worrn, se sind ok hüüt noch dor. Wie de Inrichtung an Anfang utsehn hett, weet ik nich. Aver as ik in de döttiger Johrn mienen Bubikopp stutzen leet, weern dor dree Speegels an de Wand un dortwüschen Glasschränk mit Soken, de de Kunnen dor köpen kunnen för jüm ehr Hoor un ok wat ton Raseern. Denn kreeg man dor ok Zigarrn un Zigaretten.

Lehrlinge hett Hermann Langehein jümmers utbildt. De müssen jüm ehr Bettüüch mitbringen, weern aver free in Kost un Logie. Se kreegen aver keenen Penn Gehalt oder Lohn, so weer dat dormols.

De Kunnen weern jümmers König! Hinnerk Smidt ton Bispill keem jeden Sünndag morgens Klock söss un baller so lang an de Döör bit Langhein endlich opmoken dee. Dorto mutt man weten, dat sünndags ok arbeidt wöör.

As Hermann Langhein eenmol mit Grippe dat Bett höden müß, keem Paster Schaper, de sik affsluuts nich sülven raseern kunn, un leet sik nich affwiesen. He weer Stammkunn un keem jeden Dag. Ok Jochen Slachter keem op sien Rad anfohrn. Dormols weer de Dochder Anneliese all utbildt un schull ehrn Vadder ersetten.As de Paster fardig weer, sä de: Ich bin mit dem Leben davongekommen, nun sind Sie an der Reihe. Bi Jochen Slachter weer dat veel eenfacher. He harr een rundes, schieres Gesicht un nich so veel Falten as de Paster. Ehr Vadder harr to ehr seggt: Den Slachter döffst du nich snieden, de ann keen Bloot sehn! Is aver allns goot afflopen.

Hermann Langehein sien Fro kunn goot neihn un hett dat junge Deerns bibrööcht. Eegentlich hett se dorför sorgt, dat de ehr Utstüür richt hebbt. Dat geev dat dormols jo noch. Loter hett se sik dat Friseern annohmen. Deshalv hett se in Elmshorn dat Onduleern lehrt in de twintiger Johrn un hett anfungen de Gorstedter Froonslüüd de Köpp to waschen un onduleern.

As Anneliese no ehr Plichtjohr in de Lehr schull , hebbt se Kontakt opnommen mit den Frisöör Neumann in Hamburg. Dor weer se tweeunhalv Johr un hett ehr Gesellenprüfung affleggt. Ok se hett noch dat Onduleern lehrt, wat dat Sworste in dit Handwark weer. Se weer geern in Hamborg bleven, aver as de Krieg utbröök, wöör ehr Chef introcken un de Loden dicht mookt. Dor müß se no Gorstedt trüüch, denn de Gesell hier weer, wöör ok introcken. 1948 hett Anneliese ehrn Meister mookt.

Wat dat för Kunnen geev, is meist nich to begriepen. Een Fro hett mol verlangt, se schull ehr de Hoor waschen aver dorbi oppassen, dat ehr Kopphuut nich natt warrn dee. Geiht dat eegentlich ?

Froonslüüd, de däglich melken müssen, un dorbi jüm ehrn Kopp an de Koh lehnen deen, nemmen den Ruuch an. Kloor — wenn de ehr Hoor waschen leten, stünk de ganze Salon no Kohstall. Dat weer wiss keen Vergnögen för een Friseuse.

1956 an 15. August kreeg Hermann Langehein eenen neen Lehrling. Dat weer de Söhn Theo von Annelieses Lehrmeister Neuman ut Hamborg. De hett den Loden loter övernommen, as de Barbier un Putzbüdel Langehein sik op Olendeel trüüchtrecken dee — no 38 Johr. Nu keem de Tiet von Theo Neumann. Dat is een annere Geschicht. Dorvon vertell ik neegstet Mol.

Wieterlesen: Deel 2