© Copyright by Erinnerungswerkstatt Norderstedt 2004 - 2017
https://www.ewnor.de / http://erinnerungswerkstatt-norderstedt.de
Ausdruck nur als Leseprobe zum persönlichen Gebrauch, weitergehende Nutzung oder Weitergabe in jeglicher Form nur mit schriftlichem Einverständnis der Urheber!
Diese Seite anzeigen im

Suursupp

To jede Johrstiet höört  besünneres Eeten, dat is op de ganze Welt so. Bi uns is dat eerste Fröhjohrseeten gestoovte Sniebohnen mit Soltkatüffeln un Schinken. Dorbi is de Schinken dat wichtigste Deel, denn he kommt frisch ut’n Rook un warrt nu ansneden. Nich to veel Solt- nich to hatten Rook- nich to week un nich to hatt- he mutt op de Tung tergohn. denn is he richdig.

Een anner Eeten is Boddermelksupp mit Ries, dröögte Plummen, Rosinen, Zitronenschool un Zucker dorbin un dorto gifft dat Katüffelmoos mit utloten Speck, Zibbeln un ’n Barg Petersill dorto un den Schinken blangbi. Jeder kriggt glieks twee Töllers, een för de Supp un een för dat Katüffelmoos un den Schinken.Un denn itt man ol von den eenen un mol von den annern Töller.
Arfen un Wötteln oder Spargel mit Schinken höört ok to de Fröhjohrseeten, man dat gifft dat jo nich bloß bi uns.

Nu warrt de Schinken bilütten weniger, un denn kümmt de Schinkenknoken rut un denn gifft dar Suursupp. Dat is för uns ganz wat Feines.

De Schinkenknoken, dor dröff ok noch Fleesch an sien kommt över Nacht int koole Woter, dat dat Solt ruttreckt. Annern Morgen warrt he kott affkookt un denn mit frischet koolet Woter bedeckt opsett. Glieks kommt een Hand vull Gruben dorto, Kalvertähn as wi seggt. De mookt de Supp son ganz bütten sämig. No een Stünn kommt Backobst dorto Plummen, Aprikosen, Birnen un Appelringe un ok een Stang frischen Rhabarber. In de Twüschentiet warrt dat Gemüse putzt: een lütten Blomenkohl in Stücken, Kohlrabi, Arfen un Wötteln, witte halfriepe Bohnen. Sellerie, Porree, Petersillenwötteln, Spargel un ok dat Kruut von Sellerie un Petersillnwötteln . Is dat allns fardig un in Stücken, kümmt dat allns in den Putt.  Muss di glieks eenen groten herkriegen, sünst kriggst dat nich all rin. Awer förher nemmst den Schinkenknoken rut, sniddst dat Fleesch twei un deist dat wedder to de Supp. De Knoken hett sien Deel doon, he kümmt weg.

Nu kümmt de Saft von een Zitroon un een Schuss Essig dorto, dat schall jo ok Suursupp warrn. Een bit twee Eetlöpel Zucker mookt dat söötsuur. Opletzt kriggt de Supp ehrn letzten Pfiff  von Majoran un Thymian. Wenn dat Gemüse twintig Minuten kookt hett, treckt een fienen Ruch dörch dat Huus un all froogt: Is dat bald Tiet ton Eeten?Nee, de Klüten fehlt noch. Wi nemmt gekokte Katüffeln, moost se fien un denn kümmt dor’n Portschon Mehl över, een beten Muskotnööt un Solt un een Schubs koken Woter. Allns dörchkneten  un ut den Deeg mit natte Hannen Klüten dreihn un glieks in de Supp kriegen. Wenn de wedder boben sind, mutt noch affsmeckt warrn. Noch ’n beten Solt, Zucker oder Essig? All sind an prögen un seggt jüm ehr Meen. All hebbt se een Jieper un wöllt ehr Supp op jüm ehrn Töller.
Suursupp — dorbi smeckt se am besten opwarmt an neegsten Dag.