© Copyright by Erinnerungswerkstatt Norderstedt 2004 - 2017
https://www.ewnor.de / http://erinnerungswerkstatt-norderstedt.de
Ausdruck nur als Leseprobe zum persönlichen Gebrauch, weitergehende Nutzung oder Weitergabe in jeglicher Form nur mit schriftlichem Einverständnis der Urheber!
Diese Seite anzeigen im

Urknall  -  jo oder nee

Dor is een Neeschierigen op een feine Idee kommen. He hett sik Gedanken doröver mookt, wie dat mit den Himmel un de Eer för son Physiker utsüht un wat son Paster dorto seggt. He sülven een studeerten Physiker wüß wohl nich, wo he denn stohn schull. För mi is dat eenfacher - ik weet jo nich wat de Gelehrten weet; Mien Heven is hoch, un uns Eer is schöön. Un ik bün dankbor, dat ik leven dröff op dissen Planeten.

Ik vertell ju mol, wie de Physiker un de Preester sik streeden hebbt:

An Anfang weer de Urknall. De bewirk; so meent de Physiker, dat dat Universum mit Steerns un Planeten entstohn is. Intwüschen sind wi in de Forschung so wiet, dat wi nowiesen könnt, dat de verschiedenen Galaxien noch hüüt uteenanner drifften doot.

Dorto de Preester: Dunnerwedder, wat de all rutkriegt. Een Physiker, glööv ik, versöcht allns wat wichtig  för de Menschheit is, uteenanner to tüdeln un uns denn to verkloorn, worüm dat so is. Aver se stööt jümmers an jüm ehr Grenzen, se köönt nich mehr verkloorn, as se sülven denken könnt. Dat is jüm ehr Weltbild. Aver - dat gifft ok noch den Gloven. Un de hett ok een Grenz un dat is de Heven. De will glöven, dat sien Heven dor boben existeert, dat dor wat is, wat wi nich verkloorn könnt un ok nich wöllt. Welk sind fast in Gloven, welk sind in Twievel. Von Urknall will he nich so veel weten, de stöört sienen Gloven.

Aver son Physiker is stur. He nemmt den Urknall as Grundloog un meent wieder: Dor hett de leve Gott keen Platz mehr. Allns is mit Physik to verkloorn.

De Preester kümmt nu in Fohrt: Wenn de Physiker mi dat genau bereeken kann un somit ok bewiesen, weer dat een Sensatschon, aver he kann dat nich. De Religion kannst  nich physikalisch düden.

Doch, kontert de Physiker. De Urknall liggt an de Grenz von uns Physik. Dat weer son groote Hitten, de bloß mit de Relativitätstheorie nich to verkloorn is, man mutt all de Quantenphysik anwennen. Wohrschienlich weern dat mehrere Quantenvorgänge, de uns Universum mit sien Lebensformen bildt hett. Dor is keen Platz för eenen eenzigen Schöpfer.

Nu wöör de Theologe füünsch: Wat scheert ji ju üm den leven Gott? Ji doot doch allns  bloß üm em de Menschen to vergruuln. Blievt wi mol bi ju Logik un froogt, wat weer denn vör den Urknall?

Dorvör? Nix! De Urknall is de Anfang för uns Universum mit Tiet un Ruum. Een Gott müß denn annerwegens existeern in een eegen Universum. Un dat kann man sik nich vörstelln, dat kannst ok nich verkloorn - un wat man nich verkloorn kann, is eenfach unmöglich.

Doch, seggt de Preester. Denn am Anfang weer dat Woort un nich de Knall. Dorvon steiht nix in de Bibel. Gott sä: Es werde Licht un dor wöör dat hell un Dag, un in de Nacht wöör dat düüster. Dat Woort hett de Kraft un dat glöövt de Mensch. So eenfach is dat. Verkloorn bruukst em dat nich, he weet, no de Düsternis warrt dat wedder hell. Gott seggt to uns, wo’t langgeiht, dat sien Ordnung för uns Menschen goot is. Een Deel von de Schöpfung is de Sprook, ohne de een Physiker ok nich leven kann.

Nu meent de Physiker: Loot wi mol den Urknall weg. Dat heet in de Bibel, dat Gott de Menschen mookt hett no sien Affbild. De nee Wetenschop will nu aver den Menschen sülven verkloorn. Evolutschonstheorie nöömt se dat. Un een ganz nee Chaos -Physik bringt se int Speel (wat jümmers dat is). Un bald will se ok de Seel un dat Selbstbewußtsein düden können.

Speelkroom! För mi as Preester is dat een Sook, de fast steiht un eegentlich nich so wichtig is. Veel interessanter is doch: Wo schall no Gottes Willen de Mensch hingohn, wat schall he doon, woto is he överhaupt dor? Sien Opdrag is de Welt to versorgen mit all sien Knööv un för sien Wark intostohn. De Welt is em lehnt, he schall sik nich as Herr opspeeln - ok de Preester nich un genau so wenig de Physiker. Ok de Genies nich as Einstein un sien Mackers.

Dat is so nich richdig. Dat heet von uns Physiker, dat wi allns verkloorn wöllt, dat wi allns beter weet. Dorbi sind groote Physiker oftmols demütige Menschen, weil se inseht, dat se nich allns weten könnt.Se sülven söökt no wat ton fastholn, so as de eenfachen Menschen dat hett in sienen Gloven an Gott. Aver is Gott denn een Lückenbüßer för dat, wat wi noch nich weet? Dat kann doch nich richtig wesen?

Ji Physiker weet mehr as de eenfachen Menschen, aver dat mutt för ju doch keen Extra-Religion geven. Kommt doch mol dol von ju hooges Peerd un stellt juur Fööt mol op de Eer un weest mol, wat ji von Geburt an west sind - eenfache Menschen ohne wenn un aver!

Aver stolt sind wi doch op dat, wat wi all utforscht hebbt. Un doch hebbt wi Sorgen mit unsen Erfolg. Is dat jümmers goot för de Welt? Wi wöllt eegentlich wat Godes för de Menschen doon, wat to sien Nutzen is - ok de Biologen, Chemiker un de Techniker denkt so. Aver grood deswegen müchen wi so geern weten, wat de Welt denn nu in Innersten tosomen höllt, as Faust seggt.

Am Anfang weer dat Woort, heet dat in de Bibel, un denn keem eerst de Idee von den Urknall. As dat Leven op de Eer anfüng, weer de eerste Froog: Adam, wo bist du? un de eerste Mensch anter: Hier bin ik. Antwoort is aver ok Verantwortung un dat is sien Opgoov op de Eer. Loot uns nich mehr strieden — deelt wi uns de Verantwortung — un höödt wi uns Eer, een hebbt wi bloß. Villicht warrt de Physiker un de Preester noch gode Frünnen.

Dat könnt wi uns all wünschen. Aver ik denk jümmers noch an den Urknall trüüch, de för den Physiker jo de Anfang weer von dat Universum. Wer seggt uns denn, ob nich de Herrgott sülven den Rietsticken anreeten hett un somit den Urknall sülven verursookt hett?? --