© Copyright by Erinnerungswerkstatt Norderstedt 2004 - 2017
https://www.ewnor.de / http://erinnerungswerkstatt-norderstedt.de
Ausdruck nur als Leseprobe zum persönlichen Gebrauch, weitergehende Nutzung oder Weitergabe in jeglicher Form nur mit schriftlichem Einverständnis der Urheber!
Diese Seite anzeigen im

Veerdig Johr no de School

Veerdig Johr no de School wöör ik inloodt to een Weddersehn von een Schoolklass. Jüm ehr Klassenlehrer weer mien Vadder west.
Ik hff dormols een lütte Reed holn un de güng so:

Weet ji noch, wie dat weer 1945 as de Krieg to Enn weer un de School wedder los gohn schull? Dormols geev dat man een School in Gorstedt un in de weer ok noch de Mittelschool ünnerbröcht. Dörch de Butenhamborgs — un de veelen Flüchtlingskinner, de jeden Dag noch ankeemen, harr man överhaupt keen Ohnung, wie veel Kinner disse School eegentlich besöken wulln oder müssen. Een anner Froog weer, wie veele Lehrer geev dat noch in Gorstedt? Eenige von de olen Schoolmeisters wöörn nich wedder instellt, se weern to lang in de NSDAP west. Mien Vadder harr Glück, he weer eerst 1937 in de Partei Mitglied worrn — ohne dat he dat wull- zwangswies.

Een komische Sook weer, dat he all lang een sonennte ‚Politische Leiter’ weer un dat keem so: He harr siet Johrn sik üm de Kriegsopfer un de Kriegshinterbliebenen ut den eersten Weltkrieg kümmert un jüm Arbeit un ok Renten besorgt hett. As nu de Nazis ant Regiern weern, heet dat nu ‚National sozialistische Kriegsopferversorgung’ un mien Vadder bleev de Leiter. Dat he nich in de Partei weer, hebbt se gor nich markt bit 1937. Dat aver hett 1945 bedüüdt, dat he wedder Lehrer sien kunn.

As he von de eerste Lehrerkonferenz no Huus keem, weer he ganz bestött. Man harr em 3 Klassen todeelt un in jede Klass seeten 60 Kinner — dicht an dicht, dat geev nich mol för jedet Kind eenen Platz. Sien Schooldag güng morgens Klock 8 los un no een lütte Meddagstünn, weer he obends kott no Klock 6 wedder to Huus. Dat weern däglich 9 Stünnen Ünnerricht bi 180 Kinner.

Wie un wann schull he sik vörbereiten? He harr meist keen Lehrmittel, Schoolböker geev dat nich un de olen dröff he nich bruken. Dat geev ok meist keen Hefte, keen Bleestifte - von Dinte un Bleefeddern wöllt wi gor nich eerst snacken. Von uns Verwandschoop in USA leeten wi uns Hefte un Blestifte schicken. De Hefte hebbt wi tweisneden un so wöörn Zettel un Bleestifte verdeelt, wenn mol een Klassenarbeit anseggt weer. Männicheen von ju keem mit dat glatte Popier nicht trecht, de Bleestifte rutschten jümmers dorop ut. Ji harrn sünst jo bloß Holtpopier mit Splitter dorbin. Könnt ji dat erinnern, hebbt ji dat nich vergeeten?

Wenn mien Vadder mol een Rekenarbeit schrieven leet, denn glieks in alle dree Klassen. Obends seeten he un ik dorbi un hebbt se nokeeken. Jo. ik heff em holpen, so goot as ik kunn.
In disse Tiet hett he döttig Pund affnohmen un wöög grood een beten mehr as een Zentner.He weer so mööd un oft vertwiefelt. Hebbt ji dat markt?
Wie oft hett he seggr: Wie schall ik all de Kinner bloß dat Nödigste bibringen- ik weet jo nich mol jüm ehr Nomens all. Wat schall ut disse Kinner bloß warrn?

Wie lang dat so weer. weet ik nich mehr. Aver as dor de een oder anner Lehrer instellt wöör un he endlich een Klass affgeven kunn, dor foot he wedder Moot un güng geern wedder no sien School.

Den Satz: ‚Wat schall bloß ut disse Kinner warrn?’ denn mutt ik noch mol wedder holn. Wenn ik mi hier so ümkiek, kann ik bloß seggen: ‚Ik glööv ut all sien Sorgenkinner is doch wat worrn.’ Denkt ji ok so?

Opletzt müch ik mi bi ju bedanken, dat ik hier un hüüt dorbi sien kunn.