© Copyright by Erinnerungswerkstatt Norderstedt 2004 - 2017
https://www.ewnor.de / http://erinnerungswerkstatt-norderstedt.de
Ausdruck nur als Leseprobe zum persönlichen Gebrauch, weitergehende Nutzung oder Weitergabe in jeglicher Form nur mit schriftlichem Einverständnis der Urheber!
Diese Seite anzeigen im

Swattbroot

No’n Krieg weer allns knapp. Egol von wat du schnackst, dat geev eenfach nix. Allns wöör todeelt: Tüüch, Schoh oder wat to Eten — dat geev eenfach nix ohne Marken. Un wat man op de Marken kreeg, dat reck nich hin un nich her. Op den swatten Mark kunn man wat kriegen, aver keen kunn sik dat denn leisten?

Uns Bäcker kreeg sien Mehl ton Backen leevert, ok dat wöör em todeelt. Dorvon back he denn Broot. Nu wöör aver dat Roggenmehl knapp un he kreeg Maismehl dorto. Nu müss he de beiden Sorten mischen un dorut Broot backen. Aver dat smeck uns nich un mien Modder sä: Höhnerfutter eet ick nich. Ick back mien Broot sülven.

Se köff för de Brootmarken Roggenmehl. Siet Johren hebbt wi op de affornten Feller Ähren sammelt, mit de wi uns Göös futtert hebbt. Nu wöörn de Roggenkörner utpuult un dörch uns Kaffeemöhl dreiht ton grobet Mehl. Dat mischen wi ünner dat geköffte. Von Hermann Bäcker holn wi uns Suurdeeg un frogen glieks, ob he uns Broot in sienen Backoben backen wöör. Kloor, dat mook ick.

No wat för een Rezept mien Modder den Deeg anröögt hett, dat weet ick nich. De ganze Kroom wöör in een Waschbalje vermengeleert un müss düchdig kneet warrn. Dat weer een swoore Arbeid un wi hebbt all mitholpen.

Över Nacht wöör de Deeg affdeckt un an annern Morgen wöör de Waschbalje mit de Schuuvkoor non Bäcker brööcht. Hermann Bäcker bekeek sik den Deeg un kreeg em nochmol ton Dörchkneten in een Maschien. Dorno form he ut den Deeg von Hand groote Swattbrööt un schööv se in den Backoben. Jedes Mol harrn wi son Stücker fief bis söss groote Swattbrööt. Un dat smeck grootartig, dat Hermann Bäcker froog, ob he nich ’n Stück affkriegen kunn. He weer selig un sä: Dat is wenigstens Mol een richdiget Swattbroot. In disse Tiet heff ick keen Schoolbroot mitnohmen, ick müch mien Klassenkamerodinnen dit schööne Broot nich wiesen.

Bit to de Währungsreform 1948 hebbt wi uns Broot sülven backt. Dat weer veel Arbeid, hett sik aver lohnt un Hermann Bäcker bin ick hüüt noch dankbor för sien groote Hölp.