© Copyright by Erinnerungswerkstatt Norderstedt 2004 - 2017
https://www.ewnor.de / http://erinnerungswerkstatt-norderstedt.de
Ausdruck nur als Leseprobe zum persönlichen Gebrauch, weitergehende Nutzung oder Weitergabe in jeglicher Form nur mit schriftlichem Einverständnis der Urheber!
Diese Seite anzeigen im

Is dien Auto twei?

Hebbt wi allns? Nix vergeten? Ik fohr hüüt nich noch mol los ton Inköpen! Werner is Rentner un fohrt mit siene Ingrid jümmers ton Inköpen, denn de Sleeperee kriggt se nich mehr alleen trecht. Un mol eben non Höker lopen, dat gifft dat hüüt nich mehr. Wenn du keen Auto hest, is Inköpen keen Vergnögen mehr, denn son Supermarkt liggt jo nich glieks üm de Eck.

Werner will dat Auto anspringen loten, aver dat will nich. De Motor mookt tuk tuk tuk un denn seggt he nix mehr. Werner rut ut dat Auto un den Motordeckel hoch, un kickt dorünner. Süht allns so ut as jümmers. Worüm he dat doon hett, weet ik ok nich, denn he versteiht von Technik sowieso nix. Aver dat weet jo keener un süht doch no wat ut. He klappt den Deckel wedder to un versöcht dat noch mol. Un wat deit de Motor? He springt an, as sik dat höört ‒ he hett wohl Angst kreegen, dat Werner dor wat an rümfummeln kunn.

In eersten Gang geiht dat man tögerlich los, aver dat Auto fohrt un langsom warr’t beter. So tukkert se suutje no Huus. Werner warrt dat Geföhl nich los, dat dor wat nich stimmt.

As se den ganzen inköfften Bickbeernmoos int Huus hebbt un Ingrid dat inrüümt, geiht Werner nochmol no’t Auto, dat nu op jüm ehrn Affstellplatz steiht un mookt noch mol den Motordeckel hoch. Werner stutzt. Wat liggt dor denn bobenop? He langt sik dat her. Meist glöövt he nich, wat he in den Hannen hett: De Huut von eenen Bückel (rökerten Hering) un ok de ganzen Groden(Gräten) dorto. Allens ‘n beten schietig aver genau to kennen. He gruvelt doröver no, wie dat dor hinkomen kunn.

Dor kümmt sien Nover ut de Döör un froogt: Is dien Auto twei?Ik weet nich recht, aver hier stimmt wat nich. Kannst du mi vertelln, wie dat hier ünnern Motordeckel kümmt? ‒ De Nover kickt sik dat an un seggt: Tööv mol. He geiht no sienen Komposthupen achter de Goroosch un wöhlt dor rüm. Non Oogenblick kümmt he trüüch un lacht. Den Bückel heff ik hüüt Meddag eeten un Huut un Groden inbuddelt. Dat hett sik eener wedder utbuddelt, un ünner dienen Motordeckel versteken. Dat kann bloß een Marder west sien!

Werner weet nu ok, worüm de Motor nich so wull, as he schull. Annern Morgen bringt he dat Auto no sien Warksteed un lett allns nokieken. Jo, de Marder harr all eenige Dröhd (Drähte) anknabbert. Allns wöör wedder in de Reeg brööcht.

 Aver de Froog is nu, womit kannst den Marder dorvon affhooln, wedder ünner den Motordeckel to krupen? Den Deckel nich to moken? Na, ik weet nich recht, weest du nich wat Beteres, wat Werner helpen kann?