© Copyright by Erinnerungswerkstatt Norderstedt 2004 - 2017
https://www.ewnor.de / http://erinnerungswerkstatt-norderstedt.de
Ausdruck nur als Leseprobe zum persönlichen Gebrauch, weitergehende Nutzung oder Weitergabe in jeglicher Form nur mit schriftlichem Einverständnis der Urheber!
Diese Seite anzeigen im

Dat Schemisett

In een Geschicht fünn ik dat Woort Schemisett. Dat Woort güng mi nich mehr ut’n Kopp. Hüüt heff ik mien Nokixel(Lexikon) herhoolt un sööcht, wo dat eegentlich herkümmt un wie dat richdig schreven warrt. Dat weer gor nich so licht. Opletzt fünn ik dat in een Fremdwörterbook von Duden. Dor stünn: Chemise is franzöösch un is dat Hemd, aver dat is ok dat Kleed ut Batist oder Mull, dat ünner de Bost hochbunnen warrt. Chemisett is een Vörkleed mit Spitzen un Biesen. Dat Schemisett, dat ik aver sööch, is eine gestärkte Hemdbrust für Frack- und Smokinghemden, is dat nich fein verkloort? - Stell di mol son Mordskerl von Kleederschapp vör un ünnert Kinn een Schemisett mit Spitzen un Biesen, dat ünnert Jackett rutkickt. Dat süht doch no wat ut - oder nich?

Un nu bin ik langsom dor, wo ik hin wull. Mien Grootvadder hett jümmers een Schemisett bloß mit Biesen droogen nich däglich aver doch , wenn he as Rendant von de Gorstedter Spoorkass ünnerwegens weer un ok loter, as dat no’n Krieg gor nich mehr Mood weer. Dorto höör ok noch de stieve Kroogen, de mit twee Kroogenknööp vörn un achter ant Hemd fastknööpt wöör.

As ik nu mol bi mien Tante weer, wo uns Opa leev, kloog se, dat se keen Schemisett mehr köpen kunn un de ooln all möör weern. Dor heff ik mi een as Muster utlehnt. Ik wull dat wenigstens versööken een to neihn. Dormit harr ik mi villicht wat anlacht!!

Ik heff mi dat ok nich licht mookt un heff eerstmol Biesen neiht - een non anner in Affstand von een Zentimeter un dat op uns ool Neihmaschien noch son ton Pedden. Dat weer een Arbeit - hüüt wöör ik dat nich nochmol moken. Dat heet , hüüt stellst dat op de Maschien in , un denn neiht de de Biesen fadengrade as dat sien mutt. Dat Schemisett müß ik affuttern, dormit dat ok brettstiev stärkt warrn kunn. Denn kreeg dat ok noch eenen lütten Stohkroogen rund üm dat Halslock un Knoop un Knooplock dorto. Dat Ganze süht ut as son Buschen oder Schlapperlatz för Kinner. Dree Stück heff ik fardig kregen un dorno weer ik fix un fardig von den Fummelkroom. Mien Opa hett sik freut över de neen Schemisetts un mien Tante eerst recht. Disse kunn se koken, stärken un hitt plätten, de holn wat ut.

Dat is nu över föfftig Johr her. Doran mark ik mol wedder, wo oolt ik all bin. Is doch so - jünger warrt nüms. --