© Copyright by Erinnerungswerkstatt Norderstedt 2004 - 2017
https://www.ewnor.de / http://erinnerungswerkstatt-norderstedt.de
Ausdruck nur als Leseprobe zum persönlichen Gebrauch, weitergehende Nutzung oder Weitergabe in jeglicher Form nur mit schriftlichem Einverständnis der Urheber!
Diese Seite anzeigen im

De Adolf - Kanoon

Wi sind een Johr mit’n Damper von Bergen an de Küst von Norwegen langfohrt bit no’t Nordkap un wieder bit no Kirkenes an de russische Grenz. Denn güng dat wedder trüüch von Hoben to Hoben, denn uns Damper weer een Postschipp, dat jeden Hoben anstüürt.

In Harstad, een Stadt op een Insel von de Westeralen, de vör Narvik liggt, moken wi een Bustour. Wi kreegen een patente Fro mit, de uns ehr Heimat verkloorn kunn. Sigrid heet se, un se weer een ganz vergnögte Fro.

Ton Bispill vertell se uns, dat de Dörchschnittstemperatur in Dezember + 2,8°C is. Dat heet, meen se, wi hebbt hier wenig Snee un veel Glatties. Deshalv kriegt wi hier all mit de Johrn breede Fööt, dormit wi beter de Balance hooln könnt. Sowat kann man doch nich vergeten.

Se fohr mit uns no de Adolf-Kanoon. Wi kunnen uns nix dorünner vörstelln un weern neeschierig, wat dat wohl sien schull.

De Adolf-Kanoon is mit dree annere von de Organisatschon Todt in tweten Weltkrieg op de Halvinsel Trondenes opstellt worrn. Se schulln de Tofohrt no Narvik schützen vör ingelsche Scheep un U-Bööd (U-Boote). Dacht weern de Kanoon’n för groote Schlachtscheep, de nich mehr baut warrn kunnen. De Kanoon weern trecht, un keemen no Norwegen.

Se stoht op eenen Ünnerbau un könnt in jede Richt dreiht warrn. Üm de Kanoon to bedeenen wöörn veerunsösstig Mann bruukt. Se is een riesiget Genöök. Wi weern mit twintig Mann in den Ümbau von de Kanoon. Dat Kanoonrohr hett Platz för eenen Menschen. Un ton Putzen von dat 21,5m lange Rohr müß dor een rinkrupen. Wenn de dorbin Platzangst kreeg, wöör he an den Strick, den he an eenen Foot harr, wedder ruttrocken. Dat is wohr (Ganz nebenbi: Sigrid is in dat Rohr west, wi hebbt de Biller sehn).

De Kanoon harr twee verschiedene Gronoten, een wöög 1000kg, de annere 600kg. De swoore flöög 42 km wiet, de lichtere 56 km. Dorbi dreepen se op 100m genau. De Schubkraft weer so groot, dat de Gronoten eerstmol 21.800m hoch in de Luft flöögen. Sehn kunn man se nicht aver höörn - se jaueln fürchterlich. No twee Minuten un tein Sekunnen weer dat Ziel dropen!!

Affschoten is von de Gronoten mit scharpe Munitschon keene. Man hett de Kanoon bloß mit unscharpe probeert wegen de Treffsicherheit. De ingelschen Böbersten von de Navy harrn von de grooten Kanoon höört un groten Respekt dorvör, un sind nie dorhin fohrt mit jüm ehr Scheep.

No den Krieg hebbt de norwegischen Suldoten ehr Artilleristen an de Adolf- Kanoon utbildt. Se hebbt dorbi faststellt, dat disse Angoben all stimmt. Se hebbt ton Proov ok mol een unscharpe Gronoot affschoten un doch glatt dormit een Fischerboot versenkt. Gott sei Dank, geev dat keene Doden un Verletzten dorbi. Wenn man sik vörstellt, dat dat all in Krieg möglich weer. Dat kannst meist nich glöven. De Adolf-Kanoon steiht op een Steed, de to een Kasern höört, warrt also jümmers bewacht — genau so as de Elche, de hier leevt.

All dat hebbt to sehn un to höörn kreegen. Wie geseggt, een fürchterlichet Genöök is de Adolf-Kanoon. Hüüt kannst se besichtigen. Scheeten warrt se wohl nie mehr un dat is ok goot un richdig so.