© Copyright by Erinnerungswerkstatt Norderstedt 2004 - 2017
https://www.ewnor.de / http://erinnerungswerkstatt-norderstedt.de
Ausdruck nur als Leseprobe zum persönlichen Gebrauch, weitergehende Nutzung oder Weitergabe in jeglicher Form nur mit schriftlichem Einverständnis der Urheber!
Diese Seite anzeigen im

Fohrrööd — gestern un hüüt

Radfohrn schöllt wi wedder mehr, dat Auto stohn loten. Uns mehr bewegen un nich inrosten. Radfohrn mookt Spooß un höllt jung. Wenn du dien slanke Linie wedder hebben wullt, mußt du önnig in de Pedalen pedden un ‘n Barg Kilometers achter di bringen, sonst nützt dat nix. Radfohrn is goot för’t Hatt. De Wind mookt de Lungen free. Radfohrn helpt de Muskeln in de Been to aktiveern un dormit diene Venen. Radfohrn is heel gesund, bloß hinfalln dröffst du nich, dorbi kannst di de Knoken breeken.

Ok mußt du de Verkehrsregeln kennen. Am besten du stiggst von dienen Drohtesel, wenn du över de Hauptstroot mit veel Autoverkehr mußt, un du geihst bi de Ampel op de anner Siet.

Du mußt ok weten, dat man nich mit twee Mann nebeneenanner fohrn dröff, bloß wenn man in een Kolonn is. Wichtig is, dat dien Brems un dat Licht funktschoneert. Verkehrt rüm een Eenbohnstroot fohr lever nich, dat gifft Udels, de markt dat. Dat weer so, hüüt kannst du dat aver, dat is nich ungefährlich.

Ik weer grood fiev Johr oolt, as ik op’n Jungsrad dat Fohrn lehrt heff. Ton Opstiegen bruuk ik eenen groten Steen, de an de Opfohrt leeg, un ton Affstiegen fohr ik eenfach in eenen Knick oder gegen een Wand, wat grood dor weer.

Von 1942 bit 1955 bin ik jeden Dag mit Rad non Ossentoller Bohnhoff fohrt un denn wieder mit de Hochbohn no School oder loter ton Deenst bi de Post. Mien Rad brööch ik no Ohrens gegenöver von Bohnhoff. Dor geev dat een Steed, wo man sien Rad affgeven kunn för ganz wenig Geld. In groote Schuppens un op ‘n Hoff stünnen poor hunnert Rööd. Jedet harr sienen Platz. De oole Kudenholt un sien Helpslüüd wüssen genau, wo dien Rad hingehöör buten oder binnen.

Dat natte Regentüüg kunn ik as oole Kunn in de Bood ton Affdrögen ophingen. Disse Bood harr een Kanoonoben, de in de koole Tiet ganz wichtig weer. Hier kunnst dien verklaamten Hannen wedder opwarmen. Doch lang kunn ik dat in de Bood nich uthooln — dat stünk dor no nattet Tüüg, dat du meenst, di blifft de Luft weg.

Een von de Helpslüüd weer Erwin, sienen Nonomen heff ik vergeeten. He bleev oftmols över Nacht dor. Dat heet, bit ton letzten Tog müß he woken blieven. An annern Morgen ton eersten Tog hooln em de Lüüd ut de Puuch. Wenn man denn de oole Liege in de Bood Puuch nömen kunn. Ik heff nie begreepen, dat he in disse dicke Luft — üm nich to seggen Mief — slopen kunn. Lüftung geev dat nich un dat eenzige lütte Fenster kunn man nich opmoken. Dor keem noog Luft dörch de Ritzen un wenn man de Döör opmoken dee.

Erwin weer för mi een ganz wichtigen Mann, he putz mi mien Rad, wenn ik mol loot ut Hamborg keem. För 3,50 Mark hett he dat putzt — aver wie! Nich bloß mol eben överwischt, nee richdig gründlich mook he dat.Hüüt weet ik nich, wat dat kost un op dat överhaupt eenen gifft, de di dat Rad putzt.

All dat is Vergangenheit — so lang her — aver doch wohr. Eegentlich harr dat hüüt in dat Parkhuus an Herold-Center ok son Stand geven müßt, wo du dien Rad affgeven kunnst. Weer doch gor nich so verkehrt — oder? Mi hebbt de dor krüüz un quer affstellten Rööd jümmers stöört. Dat seh doch meschand ut. Intwüschen hett man dor Fohrradstänners opstellt, de sogor överdacht sind.

Aver een Oppasser för de Rööd gifft dat nich, de denn ok von eersten bit ton letzten Tog dor is. Wer wull denn ok för anner Lüüd op de ehr Rööd oppassen. Du mußt dienen Drohtesel also goot affsluten. Ik wöör mien Rad an Bohnhoff den ganzen Dag över nich affstellen. In disse Tiet bestimmt nich, deit mi Leed, ik harr Angst — dor stoht noher twee(!!). Deshalv fohr ik nu veel weniger mit’n Rad — ik nemm den Bus oder fohr mit Auto non Herold-Center un non Bohnhoff.