© Copyright by Erinnerungswerkstatt Norderstedt 2004 - 2017
https://www.ewnor.de / http://erinnerungswerkstatt-norderstedt.de
Ausdruck nur als Leseprobe zum persönlichen Gebrauch, weitergehende Nutzung oder Weitergabe in jeglicher Form nur mit schriftlichem Einverständnis der Urheber!
Diese Seite anzeigen im

Froonslüüd ant Stüür

An jeden Sünnobendvörmeddag fohrt wi non Mark üm Kartüffeln, Obst un frischet Grööntüüg intoköpen, dat heet ick kööp in un mien Mann dörv dat dreegen. An son Dag kreeg he ünnerwegens eenen Hexenschuss, un wi weern as jümmers mit uns Auto dor. Ick harr jo keen’n Führerschien. He sleep sik denn hin nat Auto, weer aver eerst nich in de Loog in dat Auto intostiegen. Mit veel Stöhnen wegen de dullen Wegdoog hett he dat opletzt doch noch trechtkreegen. Dor heff ick mi swoorn, du leerst nu sülven Autofohrn, dat uns dat nich nochmol passeert, neben das Auto to stohn un nich no Huus to komen.

As ick den Führerschien denn endlich harr – bi de Prüfung müss ick ok trüüchoors inparken un nie wedder heff ick dat so elegant hinkreegen – hett mien Mann jümmers wat to bekritteln, wenn ick ant Stüür sitt. Eenmol hett he to mo seggt: Du musst nich sowiet links fohrn, un lütten Oogennblick loter: Du musst nich jeden Gullydeckel mitnemmen. Dor harr ick de Nees vull un heff mi nich wedder ant Stüür sett.

Ant Enn von uns Johrdusend kreeg mien Mann eenen Slaganfall, weer dorno halvsiedig lohm un kunn nich mehr Autofohrn. Wenn wi to Huus nich fastnogelt sien wullen, bleev nix anners, ick müss wedder ant Stüür. De Strootenverkehr weer in de letzten döttig Johr bannig veel mehr worrn. Ick verköff eerstmol uns grootet Auto un nemm eenen lütteren, wo aver achtern sien Rollstohl rinpassen dee. Ick söch mi een Fohrschool mit eenen ganz ruhigen Fohrlehrer un nemm een Dutt Fohrstünnen bit ick em froog: Wat meenen Se, wöörn se mi op de Menschheit losloten? Intwischen fohr ick nu all wedder siet 15 Johr Auto un heff noch keenen grötteren Unfall hatt bit op een poor Kratzer, aver mien Hobby warrt dat nie.

Veele Lüüd meent jo Öllere schöllt ehrn Führerschien affgeven. Ick weet nich wie ick mienen Mann to de veelen Termine bi all de Dokters ohne Auto bringen kunn, wi weern ok trennt von uns Kinner, de nich in Hamborg wohnt. Uns Ferien in Kühlongsborn harrn wi ok nich moken kunnt ohne dat ick ant Stüür seet. Dat Inholen üm wat to Eten to hebben, weer ok meist nich möglich, denn to Foot is dat to wiet.

Dat Meckern bin Autofohrn hett mien Mann noch nich affleggt un as mien Süster achter mi to sitten keem, höör ick von achtern un von de Siet gode Rotslääg. Rot wöör mi anseggt, as wenn ick keen Oogen in Kopp harr. Dor kreeg ick een Tüüt mit Ploster ut mien Tasch un sä: Wenn noch elkeen wat seggt, denn back ick em een Ploster opt Muul un smiet em rut. Dorno weer dat still.

Jedenfalls bill ick mi nich in wie manche Mannslüüd, dat se dat Autofohrn erfunnen hebbt. Ick bin bloß Een Fro ant Stüür.