1Juli2017

Kirschentiet

Inge Hellwege

Vörn poor Doog reep ik mien Cousine Helga an. Wi klönen all een ganze Tiet, dor sä se: Is Kirschentiet. - Wat meenst du dormit? froog ik. Ja, dat is de Tiet, wo ik jümmers bi ju west bin, weil ik mi sülven Kirschen plücken dröff un so veel eeten wi ik wull. Ik lach. Dor kann ik mi an erinnern. Mien Vadder hett aver seggt, wenn du dorvon Buukweh kriggst, hest du sülven Schuld - Stimmt, aver ik heff nie Buukweh hatt, denn heff ik wohl to wenig eeten. Wi lachen. Kannst du di noch an de Blickdosen erinnern? -

Kloor - aver wie weer dat noch? - Also mien Vadder hett oole Dosen op`n Band trocken as een Wiendruuv, de hett he in den Kirschboom opbummelt. Een oole Wäschelien mook he doran fast un dat anner Enn keem an uns Tante Meier-Fenster. Wenn nu eener mol müss, müss he ok an de Wäschelien trecken un denn klappern de Dosen in Boom. Un dit Geklapper müchen de Stare nich un flögen weg. De weern genau as du, ohne uns Kirschen wulln se ok nich leven. Opletzt stünn de Tante Meier-Döör jümmers open, jeder de vörbi güng, trock gau mol an de Wäschelien. Dor hebbt sik de Stare eenen annern Kirschboom utsööcht.

Hest du de Geschicht all opschreeven? Wenn nich, denn do dat un schick se mi. - Nu sitt ik hier un schriev un weet noch een annere Kirschengeschicht.

No de Glaskirschen wöörn de Suurkirschen riep. De wöörn inkookt in Weckglöös aver ok Kirschensupp mit Grießklüten mook uns Modder dorut. Nich immer harr se de Tiet de Kirschen uttosteen. Wenn de denn Meddags as Nodisch opn Disch keem, wöörn de Fenster opmookt. Worüm? - Denn geev dat Wettspucken bi uns. Wi versöchen de Steen ut dat Fenster no buten to spucken. Dat glück natürlich meist nich. Aver mit'n Lepel kunn man se rutscheeten. Wat'n Spooß! Wi dree Göörn un ok Vadder un Modder moken mit - dat weer een Spooß un een Lachen - to schöön. Achteran müssen wi de Steen opsammeln, Fenster un Fensterbank sauber moken - aver dat weer de Spooß allemal weert. Eegentlich müch ik mol Kirschensupp mit Steen koken - aver alleen mookt dat doch keenen Spooß oder? Schall ik dat mol probeern? Wat meenst du? -

Inge Hellwege, im Sommer 2017